Won Swaki Won Sakaia Yabalka Ba

  

Ulbanka bani God winka mita ni saki yan ba,

Timotira Wala 3:16

 

God bila ba rayakira sa bamna, ai workka sin karna munisa, bara kanra mala sa, sord ai malika wol bri ya ba sut kankikara;

Hiru Nanira 4: 12

 

Baku kabia yang bili wina taki ba, bili nani ba, ma sakras kli yang ra tawi balbia apia, sakuna dia daukaia brin ai dauki ba baha daukbia, blikri ba ka takbia.

Aiseya 55:11

 

Man bilam nani smalkanka ba ingni wankisa;

Lawana Nani 119:130

 

Won Tasba Aiska Paskan Tanka.

Kau diara wala nani sut paskras kan ba taura, Gad bui kasbrika pura ba bara tasba wal pas paskan.

Blasi Sturka 1:1

Diera nani sut witin mita daukan kan; witin apu kira diera kumi sin daukras kan, daukan bangwi ba tilara

Jon 1:3

Upla Paskan Tanka

God upla ba paska piua ra, witin ai lilka talia ba kat paskan; waitna bara mairin paskata,

Blasi Sturka 1:27

Bamna Dawan Gad bui upla ba tasba yuya pali wina paskan, bara raya kaia payaska ba kakma unta nani ra puhbi dingkan. Baku sika upla ba ai rayaka mahka brin. Bara Dawan Gad bi dus ma nani giadinka kumi mankan Eden lalma tani ra, bara witin bui upla paskata ba bahara swin.

Blasi Sturka 2:7-8

 

Bamna Dawan Gad bui upla ba Eden giadinka ra swin ba ra, plun ma mangki bara main kaikbia dukiara, witin ra naha adarka yaban: “dus nani sut giadin ra bara ba wina man piaia sip sma, sakuna diara yamni bara saura tanka kaikaia dusa ma ba wina lika man pipara. Man baha dusa ma wina pipara, kan pima kaka rait pali man pruma.”

Blasi Sturka 2:15-17

 

Won Saurka Laka Diman Tanka

 

Bara piuta ba kau auya maira kan, Dawan Gad tasba ra daiwan nani sut paskan ba tilara. Bara baha mita mairin ra makabi walan: ¿Baku bamna, Gad bui man nani ra mai win, dus nani giadin ra bara ba wina ma nani kumi sin pima apia? Bara mairin ba pana piuta ra win: Giadin ra dus nani ba ma wina yang nani piaia sip sna; sakuna giadin lilara dusa ma ba dukiara, Gad ai win yang nani baha wina pimna apia, bara sin kanbamna apia win, kan baha daukamna kaka, pruamna ai win. Bara piuta bui mairin ra win: Baha lika rait apia. Man nani pruma apia. Ban sakuna, Gad kaikisa man nani baha dusa wina pima yua ba, Gad baku namkra ilingkan kabia, bara yamni ba wihki Saura ba wal tanka kaiki banhma. Bara mairin baha walan ba ra, dusa ba kaika, dusama ba piaia painkira kan. Witn ai naakra nani ra sin pain kan, bara dusa ba sin mahka pin dauki kan, sinskira takaia daukiara. Bara ma ba wina brin, bara pin. Baha ningkara ai maya ra sin yan bara witin sin wal baku brih pin.

Blasi Sturka 3:1-6

 

Bara Dawan Gad mairin ra win:  ¿Baha di aman daukram? Bara mairin ba win: Piuta ba kunin ai munan, Ba mita yang dusa ma ba piri. Bara Dawan Gad piuta ra win: Man naha daukram ba mita, man ba aihka Saura pali mai kulkan sa daiwan nani sut tilara. Biamra purara bamna kwasi tauki kama, bara tasba yuya dabi watauki kama rayakam yua nani sut ra. Bara man mairin wal waihlam kaia daukamni. Man kiamkam ba mairin kiamka ba wal sin ai waihla kabia; witin bui man lamla ra insauhkbia, bara man pana witin ai mina plakura ra sami kama. Mairin ra witin win: Sarkam laka ba uya pali daukmna, man kwihra tiwisma ba piua ra; winam latwanka tilara luhpiam nani baiki kama; bara man kupiam brinka ba mayam kat kabia, bara witin ba man wihtkam aimaki kabia. Bara witina ra sin win: Man mayam bila baikra wali bila walram bamna, man ra mai wisatna baha dusa ba wina ma pipara, sakuna man ban dusa ba wina ma piram, sakuna man dusa ba wina ma piram; bamna man tamka, tasba na lahtuban kabia. Rayakam yua nani sut sarkam laka ra tasba wina patam saki pi kama. Kiaya wihki rahra wal saki maiki kabia, bara man insla namya ba pima. Mamwan laptika saki patam pima, tasba ra kli tawma ba kat, kan baha wina mai paskan bamna, man ba tasba yuya sma, bamna tasba yuya ra kli tawma ba kat.

Blasi Sturka 3:13-19

 

Bara dragon tar aba lulkan kan, baha pyuta almulk ba, débil Setan sin maki wi ba, tasba aiska na kupia tanis ulaki ba; witin ba won tasbara kat lulkan kan, ai enselka nani ba sin witin kulmara lulkan kan.

Reveleshen 12:9

 

Naku sika bahamna: upla kumi mita saurka laka tasbara bal diman, bara saurka ba mita prura balan; bara baku, prura ba upla sutra iliwi balan, sut saura i bangwan kan bahamna.

Roman Nanira 5:12

 

Upla nani God mawanra patkira sa

​

Yawan nani sut, sip baku wan mawahkan, kumi bani ai yabalka ra tawi wan; sakuna Dawan ba, yawan nani sut wan saurka ba, witin ai purara sunan.

Aiseya 53:6

 

Dawan kasbrika pura wina upla nani ra kaikisa, baha nani tilara diara tanka bri ba kum kaikaia, upla kum God plikisa sapa. Sakuna witin nani sut yabal saura ra man wan, witin nani sin sut aikuki baku warha takan. !Yamni dauki ba kumi sin apu! !Apu, kumi sin apu!

Lawana Nani 14:2-3

 

ulban ba baku: Kasakkira apu sa, kumi sin apu:

Bara kupia kumi yabalka witin nani kaikras kan: God sibrinka witin nani nakra nanira apu sa…. sut lika saura i bangwan bamna, bara God wina mayunra ba praiska sip alkras sa;

Roman Naira 3:10, 17, 18 ,23

 

Sakuna ulban ba diera nani sut won saurka laka mununtara prak prakan,

Galesha Nanira 3:22

 

God Uplara Latwan Kaiki ba Laka

 

Bamna God tasba na ban latwan kaikan, witin ai Lupia kumi man sakan ba yan, ya ya witinra luki ba tanis tiwaia apia sika, sakuna raya ban kaia ba laka briaia.

Jon 3:16

 

Nahara ni God latwanka laka yawon tilara latan sakan kan: god ai Lupia kumi man sakan ba naha tasbara blinkan sa, yawon witin mita ni raya kaia ba mata. Nahara sika latwan laka: yawon Godra latwan kaikan lika apia, sakuna witin bui latwan won kaikan sika, bara ai Lupia ba blikan wapni sakaia sakrifaiska kaia yawon saurka nani ba dukiara.

Jon Dukia Blasi 4:9-10

 

God Lupia bani Tasbara Balan Ba Tanka

​

Baha bila kasak sika, maka yamni briaia sin aitani poli man sa: Kraist Jisus na tasbara balan upla saurakira nani swaki sakaia baha nani tilara yang sika ta brisni:

Timotira Blasi 1:15

 

Man nani kuppiamra naha tanka luks, naha sin Krist Jisus kupiara kan… Sakuna ai wina diera lua sakan, ban alba talia brin, upla lilkara daukan takan.

Filipai Nanira 2:5,7

 

Witin tasbara kan, tasba sin ai mita ni paskan kan, sakuna tasba witin ba kakras kan.

Jon 1:10

 

Bara Jisus Krist aisubanka dukiara nan kata: Ai yapti Meri Josef briaia wol daukan kan, kau witin nani wol aikuki prawras kan, kaikan pot kwira kan Spirit Holikira wina.

Bara naha aiska na takan, baha ba baku takaia kan Dawan bui ai dara aisasara mita aisin ba, nan wisa: Kais mairin tyara ba kwira bribia, bara ai lupia waikna kum sakbia. Bara witin nani ai nina Imanyuel makbia;

Matyu 1:18;22-23

 

Bara witin ai lupia waikna kum sakbia, ai nin man Jisus makma: witin sika bamna ai uplika nani ba swaki sakbia witin nani saurka nani wina.

Matyu 1:21

 

Storka ba Jisus Nasaret wina ba dukiara kan, God bui Spirit Holikira witin purara laikan, karnika sin: bara witin watauki diera yamni man dauki kan, debil mita taibi bri ka uplika nani sut sin raki kan; God witin wol kan bamna.

Apostel Storka 10:38

 

Bara Jisus wan taun nanira sut taun uria nanira sin sut, ai prerska watla nanira smalki, king laka storka yamni sin aisi, bara siknis bani won wina latwanka bani sin raki kan.

                                        Matyu 9:35

Bara upla kwara nani uya witinra balan, witin nani ai kulma bri kan skawa nani, blaindkira nani, bilas nani, wala nani sin uya, bara Jisus minara ikan; bara witin baha nani rakan.

                                      Matyu 15:30

 

 

Witin Pruan won Saurka Wapni Sakaia.

 

Bara wisata: Upla Lupika Waikna saurakira nani mitara mangkan kaia sa; dus prinira sin saban kaia, bara yu yumpara kli buaia.

                                            Luk 24:7

 

Bara witin nani baha tasbaiara balan kan, Won Lalkamka (Kalvari) wi ba, witin nani bahara witin ba dus prinira saban, baha Saura dadaukra nani ba sin, kumi ai mita aikikara, wala ai smikara. Bara Jisus bila: Aisa, baha nani patka ban swi tiks; witin nani kaikras bamna, dia witin nani dauki na.

                                     Luk 23:33-34

 

Upla nani witin ra bahki kulki lulki swin, waitna kum ai wina latwanka uya bri kan, pat wahwaia ba ai natka takan. Witin ra upla kum baku kaikaia uplika apia kan, yawan bui witin ba bahki kulkan, yawan bui witin ba wan tilara kulkras. Ban sakuna, yawan wan patka nani wahwaia kan ba witin twilkan, bara yawan wan wina latwanka patka nani ba witin mita wahwan; yawan lukan Gad mita witin ra klala yaban insauhkan, klala yabi mayara batakan. Sakuna witin ba rausauhkan kan yawan lika Dawan mapara babura nani takan taka mita, wipan, ai taya klungwan yawan wan saurka nani ba tawan; yawan ra wan kupia laka ba wankaia klalka ba witin purara sunan, witin ai wina sukwanka nani ba mita yawan nani wan rakan. Yawan nani sut, sip baku wan mawahkan, kumi bani ai yabalka ra tawi wa; sakuna Dawan ba, yawan nani sut wan saurka ba, witin ai purara sunan. Witin pat apu pali kan silak watla ra mangkan bara upla kum sin apu kan witin tawan aisaia; upla kumi sin witin dukiara dia takbia ba lukras kan. Naha tasba wina upla nani ba mita daiki sakan, upliki nani saurka ba mita witin ra ikan. Witin ba, watawikira nani raitika ra bikan, witin watawika laka lika daukras kan, ai bila ra sin kunin laka apu pali kan sakuna. Baha mita Gad bui witin ra pliska kum yabia upla tara nani tilara, karnikira nani ba aikuki tilara pura lubia, kan witin pruaia ai wina ba yan, watawikira nani tilara kulkan kata, kan kasak pali sika upla manis upla saura ba witin twilkan upla saura nani tawan ai pura sunan.

                               

                          Aiseya 53:3-6,8,9,12

 

Ta polira bamna yang man nani mitamra baha ba mangkri, yang sin mitira mangkan briri ba: Kraist yawan saurka nani ba kat;

                             Korintra Blasi 15:3

Bara Jisus  bila witin nanira kli ki: Kasak, kasak man nanira mai wisni: Yang sika ship nani dorka ba. Yang sika shepherd yamni; shepherd yamni ba ai solka ba iki swisa ai shipka nani ba mata. Ship nani wala sin yang brisni, naha kralka wina apia sa: baha nani sin yang ban bribalaia sin, bara witin nani yang bili baikra walbia; bara dakni kumi man takbia, shepherdka sin kumi kabia.

                                   Jon 10;7,11,16

 

Witin Raiti wina Buan, bara Purara Uli Wan.

 

Witin bila witin nanira: Naku ulban sa, Kraist ba pat wauaia kan, yu yumpara sin pruan nani wina kli buaia. Bara saurka wina tauaia laka, upla saurka nani ban swi takaia laka sin upla sat banira witin ai nani bri maki kira aisi smalkaia kan, Jerusalem ba wina sin aimakaia.

                                     Luk 24:46-47

Witinka ba God yu yumpara kli bukan, witin ba sin yan latan marikan kan upla bangwira sut lika baku yaras, sakuna witnis nanira, God kau kan wina bak sakata ba, ao yang nanira, witin wol iwi plun piri diera sin diri na, witin prian wina buan kan ningkara.

                    Apostel Storka 10;40-41

 

Baha nanira sin witin ai wina raya kan latan marikan, pat wauan ba ning kara, tokin nani ailal ba mita; witin nani witin ba yu yawanaiska wol latan kaikan, bara witin baha nanira diera nani God king aimaki ba laka dukiara win. Naha diera nani aisin bara, witin nani kaiki kan, witin purara briwan kan; bara kasbrika kumi witin ba witin nani nakra wina saki brin

                          Apostel Storka 1:3,9

 

Bara upla mawanra latan sika, Godra luki kaia dara prakan tanka ba tara sa: Witin ba won winara latan sakan kan, Spiritra kasakkira kulkan kan; Ensel naniwitin ba kaikan; Ai tanka aisi smalkan kan upla satka nani tilara; prana tilara purara briwan kan.

                            Timotira Blasi 3:16

 

Sakuna nanara Kraist pruan nani wina buan sika, yapan bangwi ba wina ma tawakia ba. Upla mita ni prura balan bika, bahamna upla mita sin pruan nani buaia tanka balan. Kan baku Adamra prakan sut ba prui bangwisa, naku sin Kraistra prakan sut raya daukan kabia.

                      Korintra Blasi 15:20-22

 

God won Swaki won Sakaia Yabalk ba.

 

Bara baha nani silak watla wina sakan, bara win: Witki nani, yang naki munaia sni, ai sakan kai aba mita? Bara witin nani bila: Dawan Jisusra kasak lukram, man bui, man wamtla suliarka nani ba sin.

                    Apostel Storka 16:30-31

 

Bamna man nani kupiam ulaki maka taus, bara mika man nani saurkam nani dikan kabia, bara baku Dawan mawan wina pain won bukaia taimka nani balbia;

                           Apostel Storka 3:19

Bara Piterbila witin nanira ban win: Man nani kupiam ulaks, bara kumi bani yarka mai tabi mai daukbia Jisus Kraist nina ba kat, saurkam nani ban swin tikan kaia ba mata: bar aman nani Spirit Holikira presentka ba brima.

                           Apostel Storka 2:38

 

Yawan won saurka nani dara sakbia kaka, witin lika kasak, ai laka sin kasakkira, bamna won saurka nani ba ban swi tikbia, bara watauika laka sut ba wina won sikbi klin won daukbia.

                            Jon Dukia Blasi 1:9

 

Baha ba nan sa: Man bilam wol latan aisama kaka, man lukisma Jisus ba Dawan sa, man kupiamra sin kasak lukma God witinba pruan nani wina bukan sa, man mai swaki mai sakan kabia. Won kupia ni bamna yawan kasak lukisa, kasakka laka briaia dukiara; won bila ni sin yawon lukan tanka ba latan aisisa, won swaki won sakaia ba dukiara.

                  Roman Nanira 10:9-10

 

Kupia yamni laka ni man nani mai swaki mai sakan sa bamna, kasak lukan ba mita; naha na sin man nani poli wina apia sa, God presentka sika;

                              Efesus Nanira 2:8

 

Ya ya bamna Dawan nina maki witinra winbia swaki sakan kabia.

                          Roman Nanira 10:13

 

Baha sut Aisa yangra aikan ba yangra balbia; witin sin yangra aula ba, yang sip kangbi sakamna apia poli.

                                            Jon 6:37

 

Naha si raya ban kaia ba laka, witin nani mai kaikaia kan, God yakan kasak aingwa sma, Jisus Kraist ba sin man bui blikram ba.

                                            Jon 17:3

 

Witin Talia mita won Atki won Sakan.

 

 

Sakuna nanara Kraist Jisusra mai prakan lakara man nani blasi laiura poli katma ba God lamara mai mangkan sa Kraist talia ba mita.

                             Efesus Nanira 2:13

 

Sakuna yawan ingnira watauki kaka, witin kan ingnira baku, yawan kumi ai walka wol aikuki asla diera brisa, bara ai Lupia Jisus ba talia won saurka sut ba wina won sikbi kiln won daukisa.

                            Jon Dukia Blasi 1:7

 

God bangwanka aiska ba witinra ni iwaia ban yamni lukan bamna, munisin witin mita ni diera nani sut kli witin wol asla uplika sakaia, witin ai talia dus prinira laikan ba mita kupia kumi laka daukan kan bara; ao, witin mita ni, diera nani tasbara saba, diera nani hevenra saba.

                        Kolosi Nanira 1:19-20

 

Man nani kaikisma bamna, man nani lika aisauaia dukia nani ni, ala pini ni lala pauni ni sin, mai atki mai sakras kan man nani baki tauki kapram laka ba wina, damikam nani maikata ba; sakuna Kraist talia ni, manakira kan ba, ship lupia ai wina watauan apu kira ai taya saukan lua sin dukia ba baku:

                    Piter Dukia Blasi 1:19,20

 

Witinkara won prakan lakara yawan witin ai talia mita won atki won sakan balaka brisa, won swakwanka nani ban swin tikan laka ba, witin ai kupia yamni laka manas ya ba kat,

                              Efesus Nanira 1:7

 

Ai rayaka bri nani ba sut, tala bri ba mita raya sa. Baha mita yang bui man nani ra mai wiri, tala ba ni baman altarki purara laiki upla saurka nani daukiba ba pura mana aibapaia, kan tala ba sika upla rayaka mana aibapi ba.

                               Libait Laka 17:11

 

Baku kan upla kumi Kraist wol asla takan kaka, paskanka raya kumi sika: diera almuk nani ba lui wan; kais, diera raya nani takan.

                            Korintra Wala 5:17

 

            Spirit Holikira Ba.

 

Yang sin Aisara puri sunamni, bara witin man nanira Maisananikra wala maikbia, bara witin man nani wol kaia ban kaiara, baha lika kasak tanka Spiritka ba; witin ba tasba na sip briaia apia sa; witin tanka kakaira sin apia sa. Man nani witin tanka kaikisma, witin man nani wol iwi bamna, witin sin man nani kupiamra bara kabia.

                                      Jon 14:16,17

 

Sakuna Maisananikra ba, Spirit Holikira ba, Aisa bui yang nini bri luki blikbia ba, witin diera nani sut mai smalkbia, man nani kupiam sin kraukbia diera nani sut yang mai wiri ba dukiara,

                                          Jon 14:26

 

Munisin God Spiritka Holikira ba sarka paskpara, witinka ni man nani sil baku mai prakan kan atki sakaia yua ba dukiara.

                             Efesus Nanira 4:30                            

 

Sakuna yang naku wisni: Spirit mita ni watauki bas, bara man nani won wina brinka karna ba kat sip daukma apia.

                          Galesha Nanira 5:16

 

Bamna an poli saba God Spiritka bui yabalra bri auya ba, naha nani sika God lupia nani.

                            Roman Nanira 8:14

 

Munisin man nani wain blaka takpara, baha mita pul yaia laka takisa bamna, sakuna Spirit ni aibangwi bas.

                             Efesus Nanira 5:18

Sakuna Spirit ba ma lika latwan laka, Lilia laka, kupia kumi laka, wihka bila kaikaia laka, yamnika laka, won kupia tanka yamni, kasak laka, praud apu laka, won kupia alki takaskaia laka; bahamuna nani mapara la sip buras.

                     Galesha Nanira 5:22-23